Şotlandiyada 280 illik partlamamış mərmi tapıblar
Şotlandiya Milli Fondu İnverness yaxınlığında yerləşən Kalloden döyüş ərazisində partlamamış minaatan mərmisinin tapıldığını bəyan edib.
Xia.az -ın məlumatına görə, bu barədə “Fox News” xəbər verib.
Bildirilir ki, 1746-cı ildə hökumət qüvvələri tərəfindən istifadə edilən bu sursat ümumiyyətlə partlamayıb.
Kalloden döyüşü 1746-cı il aprelin 16-da baş tutub. Həmin vaxt Çarlz Edvard Stüartın komandanlıq etdiyi Yakobit ordusu bir saatdan da az müddət ərzində kral II Corcun qoşunları tərəfindən ağır məğlubiyyətə uğradılıb. Bu toqquşma Stüart sülaləsinin hakimiyyətini bərpa etmək istəklərinə son qoymaqla yanaşı, Britaniya ərazisində baş vermiş sonuncu irimiqyaslı döyüş kimi tarixə düşüb.
Arxeoloqların qənaətinə görə, bu, sözügedən döyüş meydanında üzə çıxarılan və bütövlüyünü tam qoruyub saxlayan ilk sursatdır. Ekspertlər hesab edirlər ki, bu mərmi “Coehorn” tipli minaatan vasitəsilə atılıb. Sursatın bataqlıq sahəyə düşməsi nəticəsində partlayıcı maddənin alışmasından öncə fitil sönüb. Mərminin daxilində bitki qalıqları və tıxac izləri hələ də qalmaqdadır. Təmizlənmə prosesi vaxtı “yüngül ekzotermik reaksiya” müşahidə edilsə də, mütəxəssislər obyekti zərərsizləşdirərək onun tam təhlükəsiz vəziyyətə gətirildiyini təsdiq ediblər.
