“Yevlax Səhiyyəsində Fazil İsmayılov İmzası: Peşəkarlıq və Humanizmin Vəhdəti”
Həkimlik yer üzünün ən nəcib, eyni zamanda ən məsuliyyətli peşələrindən biridir. Əsl həkim təkcə tibbi bilikləri ilə deyil, həm də xəstəsinə verdiyi ümidlə, göstərdiyi xüsusi qayğı və sevgi ilə seçilir. Ömrünü xalqın sağlamlığına həsr edən ziyalılardan biri də Yevlax Rayon Mərkəzi Xəstəxanasının direktoru, tanınmış həkim İsmayılov Fazil Valeh oğludur.Onun istər Yevlaxda, istərsə də bütövlükdə respublikamızda qazandığı nüfuz və rəğbət illərin gərgin zəhmətinin, peşəsinə olan sonsuz sevginin nəticəsidir.Fazil İsmayılov zəngin təhsil və iş təcrübəsinə malik yüksək ixtisaslı mütəxəssisdir. O, Azərbaycanda və keçmiş Sovet məkanında qabaqcıl ali təhsil ocaqlarından hesab edilən Nəriman Nərimanov adına Azərbaycan Dövlət Tibb Universitetinin məzunudur. Əmək fəaliyyəti dövründə respublikanın müxtəlif səhiyyə ocaqlarında rəhbər vəzifələrdə çalışıb, idarəçilik qabiliyyəti ilə hər zaman kollektivin rəğbətini qazanıb.Fazil həkim həm də öz yerinə-yurduna, el-obasına dərindən bağlı bir insandır. Onun peşəkarlığı sərhədləri aşmış, bir müddət Səudiyyə Ərəbistanında da ixtisası üzrə uğurla fəaliyyət göstərmişdir. Lakin qəlbi hər zaman doğma Azərbaycanla döyündüyündən, yenidən Vətənə qayıdaraq öz bilik və bacarığını soydaşlarının sağlamlığına xidmətə yönəltmişdir.2021-ci ilin sentyabr ayından Yevlax Rayon Mərkəzi Xəstəxanasının direktoru vəzifəsinə təyin olunan Fazil İsmayılov, hazırda rəhbərlik etdiyi tibb ocağını müasir standartlara uyğunlaşdırmaq, əhaliyə göstərilən tibbi xidmətin keyfiyyətini ən yüksək səviyyəyə qaldırmaq üçün böyük fədakarlıqla çalışır.Fazil İsmayılovun ömür salnaməsində xüsusi bir qürur səhifəsi var ki, bu da Vətən qarşısındakı müqəddəs borcun yerinə yetirilməsi ilə bağlıdır. Coğrafi mövqeyinə görə Qarabağ cəbhəsinə yaxın olan Yevlax rayonu Birinci Qarabağ müharibəsi, Xocalı faciəsi, 2016-cı ilin Aprel döyüşləri və nəhayət, 44 günlük Vətən Müharibəsi zamanı ən gərgin rejimdə işləyən arxa cəbhə şəfası rolunu oynamışdır.Təcrübəli reanimatoloq-anestezioloq kimi Fazil həkim şəxsən cəbhə bölgələrindən yaralı əsgər və zabitlərimizi, eləcə də dinc sakinləri səhra hospitallarına və Yevlax xəstəxanasına daşımış, gecə-gündüz bilmədən yüzlərlə insanı yenidən həyata qaytarmışdır. Onun bu fədakar fəaliyyəti dövlətimiz tərəfindən yüksək qiymətləndirilmiş, o, “Tərəqqi”, “Böyük Zəfər” və “Həzi Aslanov” medalları ilə təltif olunmuşdur. Zəfərdən sonra da o, öz fəaliyyətində şəhid ailələrinə, qazilərə xüsusi diqqət və qayğı ilə yanaşmış, bu zümrədən olan vətəndaşlarımızın işlə təmin olunmasına hər zaman dəstək vermişdir.
Ziyalı Ailəsinin Layiqli Davamçısı.
Fazil İsmayılovun yüksək insani keyfiyyətlərə və güclü təşkilatçılıq qabiliyyətinə malik olmasının təməlində onun böyüdüyü nümunəvi ailə mühiti dayanır. Belə ki, atası tanınmış ictimai-siyasi xadim Valeh İlyas oğlu İsmayılov Yevlaxın tarixində dərin iz qoymuş ziyalılardandır. Valeh İsmayılov 1960-1962-ci illərdə Yevlaxda MTS direktoru, 1962-1965-ci illərdə Yevlax Rayon İcraiyyə Komitəsinin sədri işləmişdir.Ulu Öndər Heydər Əliyev 1969-cu ildə Azərbaycanda hakimiyyətə gəldikdən sonra Valeh İsmayılovun idarəçilik məharətini yüksək qiymətləndirərək onu irəli çəkmiş və o, 1971-1989-cu illərdə Yevlax Rayon Partiya Komitəsinin 2-ci katibi vəzifəsində çalışmışdır. İki ali təhsilli (Moskva Ali Partiya Məktəbi və Azərbaycan Kənd Təsərrüfatı İnstitutu) dövlət xadimi olan Valeh müəllimin ailəsində böyüyən Fazil İsmayılov da atası kimi hər zaman dövlətə, azərbaycançılıq ideologiyasına, Heydər Əliyev irsinə və Prezident İlham Əliyevin siyasi xəttinə sadiq qalmışdır.“Bu gün Fazil İsmayılov yalnız peşəkar həkim kimi deyil, həm də insanlara münasibəti, dövlətçilik mövqeyi və idarəçilik bacarığı ilə seçilən rəhbər şəxslərdən biri kimi tanınır. Uzun illərin təcrübəsi, müharibə dövründə göstərdiyi fədakarlıq və səhiyyənin inkişafı istiqamətində həyata keçirdiyi fəaliyyət onu Yevlaxın nüfuzlu ziyalılarından birinə çevirib.” XİDMƏTİNDƏ UĞURLAR ARZU EDİRİK.