Hindistanda müxalifət lideri saxlanılıb

Müxalifətçi Hindistan Milli Konqresi (HMK) partiyasının lideri Rahul Qandi və partiyanın baş katibi, onun bacısı Priyanka Qandi Varda paytaxt Nyu-Delhidə Hindistanın Baş naziri Narendra Modinin iqamətgahı qarşısında keçirilən etiraz aksiyası zamanı polis tərəfindən saxlanılıblar.

Xia.az  bu barədə “India Today” telekanalına istinadən xəbər verir.

Qandi və HMK-nın digər tərəfdarları imtahan materiallarının sızması ilə bağlı qalmaqaldan sonra ölkənin təhsil naziri Dharmendra Pradhanın istefaya göndərilməsi barədə gənclərin tələblərini dəstəkləmək üçün toplanıblar. Onlar, həmçinin “Parlamentə yürüş” aksiyasının dağıdılması ilə bağlı izahat tələb ediblər.

Polis əməkdaşları aksiya iştirakçılarını etiraz yerindən avtobuslarla aparmağa başlayıblar. Saxlanılanlar arasında Qandi və bacısından başqa, ölkə parlamentinin müxalifətçi deputatları da olub.

Hökumət rəhbərinin iqamətgahı ətrafındakı ərazi nümayişçilərdən təmizlənib. Eyni zamanda, aksiyanı davam etdirmək üçün Cantar-Mantar rəsədxanası yaxınlığındakı meydana azı 300 nəfər toplanıb. Ərazidə hərbiləşdirilmiş polis bölmələri yerləşdirilib.