“Azərbaycan Uşaqları” İctimai Birliyinin mətbuat katibi Rüfət Zəkizadə ilə əlaqə saxladıq.
GunXeber.Az-a açıqlamasında bildirdiki uşaq sığınacağa Daxili İşlər Nazirliyinin əməkdaşları tərəfindən yerləşdirilib və ilkin olaraq yerləşdirilən zaman uşağın şəxsi məlumatları, aşkarlanma şəraiti ilə bağlı Sosial Xidmətlər Agentliyinə məlumat verilərək sistemə əlavə olunub.Uşağın müəssisədə ilkin qiymətləndirilməsi Sosial Xidmətlər Agentliyi tərəfindən aparılıb.
Az yaşlı sığınacağa yerləşdiyi gündən indiyədək “Azərbaycan Uşaqları”İctimai Birliyinin Uşaq Sığınacağı Reinteqrasiya Mərkəzinə valideyni tərəfindən uşaqla görüşmək barədə heç bir rəsmi müraciət daxil olmayıb.
Mətbuat katibi sığınacaqda reabilitasiya keçən hər bir uşağın reabilitasiya müddətində qiymətləndirilməsi, ailənin ünvanda qiymətləndirilməsi ,ailəyə bərpası və ya dövlət müəssisəsi ilə təmin edilməsi Sosial Xidmətlər Agentliyinin qərarı əsasında həyata keçirildiyini qeyd edib.
22:39
“Yasımız düşüb və uşağı yas evinə aparmamaq üçün dayə tutmuşuq. Dayə uşağa öz evində baxıb. Ödənişini etmişik”.
GunXeber.Az xəbər verir ki, uşağının qaytarılmayacağı halda sığınacağı intiharla hədələdiyi deyilən qadın söyləyib.
O bildirib ki, uşağı dayəyə tapşırıb rayona getdikdən bir neçə gün sonra dayəyə ediləcək ödənişlə bağlı problem yaranıb:
“Dayəyə bildirdim ki, ödənişlə bağlı problemi həll edəcəyəm, səbirli olun. Həmin dayə əvvəllər də uşağıma baxıb. Elə olub ki, uşağım üç gün, bir həftə yanında qalıb. Lakin bu dəfə bir həftə keçəndən sonra dedi ki, uşağı sığınacağa verəcəyəm. Dedim ki, belə etməyin, uşaq sığınacağa düşsə, onu oradan götürə bilməyəcəyəm. On gündən sonra xəbər tutdum ki, mənim uşağım sığınacaqdadır. Halbuki uşaq sığınacağa yerləşdiriləndə bizə heç bir məlumat verilməyib”.
O deyib ki, uşağının sığınacaqdan götürülməsi ilə bağlı Kəmalə Ağazadənin özü ilə danışmasa da, köməkçisi ilə əlaqə saxlayıb:
“Bu zaman mənə bildirildi ki, Əmək və Əhalinin Sosial Müdafiəsi Nazirliyinə müraciət etməliyəm. Nazirlikdən isə bildirdilər ki, sığınacaq onların tabeliyində deyil. Mən bunu sığınacağa bildirdim, mənə dedilər ki, yanlış yerlə əlaqə saxlamışam”.
“Uşaq sığınacağa veriləndən mən onlarla danışıram. Sığınacağa zəng etmişəm, uşağımı verməyiblər, intihara cəhd etmişəm. Üç ay özümdə olmamışam, müalicə almışam. Çünki uşağımı mənə vermirlər. Qolumda intihara cəhdin ləkələri hələ də qalır. Səhhətimlə bağlı problemlərim olub deyə birbaşa sığınacağa gedə bilməmişəm. Uşağımın verilməyəcəyi halda gedib sığınacağın qapısında qalmağımın mənası nədir? İndi mənim haqqımda yanlış məlumatlar paylaşılır”, – deyə o bildirib.
O deyib ki, uşağının doğum günü olacaq və istəyir ki, uşağı sığınacaqdan ona verilsin:
“İndi yenidən səhhətim düzəlib. Hətta hamiləyəm. Həm maddi, həm də psixoloji vəziyyətim qaydasındadır. Uşağımı istəyirəm”.
Sığınacağa yerləşdirilən uşağın qohumları Azərbaycan Uşaqlar Birliyi-Uşaq Sığınacağı Reinteqrasiya Mərkəzinə hədə-qorxu gəlir, intiharla təhdid edir.
GuNXeBeR.Az xəbər verir ki, bu barədə Birliyin sədri Kəmalə Ağazadə özünün “Facebook” səhifəsində paylaşım edib.
O bildirib ki, təxminən, bir il öncə ana iki yaşlı övladını dayənin yanına qoyaraq gedib və onunla 28 gün ərzində əlaqə saxlamayıb:
“Dayə uşağın anasından xəbər çıxmadığını görəndə vəziyyətlə bağlı qaynar xəttimizə müraciət edib. Daha sonra polis əməkdaşlarının iştirakı ilə uşaq sığınacağa yerləşdirilib. Ananı dəfələrlə sığınacağa dəvət etsək də, gəlmədi. Lakin bundan sonra naməlum şəxslər müxtəlif nömrələrdən zəng edərək özlərini uşağın dayısı, əmisi və ya digər qohumları kimi təqdim ediblər. Onlar təhdidedici ifadələr işlədərək, uşağın təhvil verilməsini tələb edirlər. Bizə hədə-qorxu gəlir, öldürəcəklərini deyirlər”.
K.Ağazadənin sözlərinə görə, ona mesaj yazaraq bildiriblər ki, uşağı onlara təhvil verməsələr, ana intihar edəcək və bunda onu günahlandıracaq.
“Sakitcə, səssiz-səmirsiz ana gələcək və siz uşağı anaya izahatsız təhvil verəcəksiniz. Əks halda ana canlı yayım açacaq və hamının gözü qarşısında intihar edəcək. İntihar edərkən Kəmalə Ağazadənin bu intiharda günahkar olduğu bildiriləcək”, – deyə K.Ağazadə həmin şəxslərin mesajda yazdıqlarını bildirib.
Birliyin sədri GuNXeBeR.Az-a açıqlamasında deyib ki, bununla bağlı Daxili İşlər Nazirliyinə şifahi məlumat verilib.
“Qadın israrla bizə zəng edərək təhdid edir. Bununla bağlı əlimizdə materiallar var”, – deyə o bildirib.