Valideynlərini ziyarət etməyə gəldi, kənd sakinlərinin evini taladı

Biləsuvarda bir neçə yaşayış evindən oğurluq etməkdə təqsirləndirilən şəxsə hökm oxunub.

Xia.az  “Qaynarinfo”ya istinadla xəbər verir ki, məhkəmə materiallarına görə, təqsirləndirilən şəxs 2025-2026-cı illər ərzində Biləsuvar rayonunun Zəhmətabad və Bağbanlar kəndlərində yerləşən fərdi yaşayış evlərinə müxtəlif vaxtlarda qanunsuz daxil olaraq silsilə oğurluqlar törədib.

İttihama əsasən, o, gecə saatlarında hasardan aşaraq evlərin həyətinə keçib, pəncərələri dəmir parçası ilə açaraq yaşayış sahələrinə daxil olub.

Cinayət əməli üzrə zərərçəkmişlərə ümumilikdə minlərlə manat məbləğində maddi ziyan dəyib. Talanan əşyalar arasında 585 əyarlı qızıl boyunbağı və üzük, 1 100 manat nağd pul, elektrik naqilləri, “BT-2500” markalı kondisioner, samovar, eləcə də müxtəlif yuyucu vasitələr olub.

Təqsirləndirilən şəxs məhkəmədə özünü qismən təqsirli bilərək bildirib ki, boşandıqdan sonra maddi vəziyyəti ağırlaşıb. Onun sözlərinə görə, himayəsində iki azyaşlı övladı var və hər ay onlar üçün aliment ödəyir. Daimi iş yeri olmadığını, yalnız günəmuzd fəhlə kimi çalışdığını deyən təqsirləndirilən şəxs maddi çətinliklər səbəbindən oğurluq etmək qərarına gəldiyini bildirib.

O qeyd edib ki, Biləsuvar rayonunda yaşayan valideynlərini ziyarət etmək üçün tez-tez rayona gəlib və həmin vaxtlarda oğurluq hadisələrini törədib.

Məhkəmə təqsirləndirilən şəxsi Cinayət Məcəlləsinin 177.2.2-ci (təkrar oğurluq) və 177.2.3-cü (yaşayış sahəsinə qanunsuz daxil olmaqla oğurluq etmə) maddələri ilə nəzərdə tutulan cinayətlərin törədilməsində təqsirli bilib. Hökmə əsasən, onun barəsində 2 il 9 ay müddətinə azadlıqdan məhrum etmə cəzası təyin edilib.