Ukraynalı sabiq səfirin ailəsinin ABŞ-də milyonlarla dollarlıq əmlakları üzə çıxıb

Ukraynanın Amerika Birləşmiş Ştatlarındakı keçmiş səfiri Oksana Markarovanın həyat yoldaşı Florida ştatında dəbdəbəli daşınmaz əmlak əldə edib.

Xia.az  xəbər verir ki, bu barədə açıq reyestrlərə istinadən “RIA Novosti” məlumat yayıb. Xəbərə görə, bu mülk barədə məlumatlar Markarovanın Ukraynanın Korrupsiyaya qarşı Mübarizə üzrə Milli Agentliyinə təqdim etdiyi ailə bəyannamələrində yer almayıb. Bununla yanaşı, sənədlərdə diplomatın əri Daniil Volınetsin “Accordbank”ın təxminən 75 faiz səhmlərinə sahib olduğu vurğulanır. Materialdan bəlli olur ki, o, 2024-cü ilin iyul ayında “VRZ 2036 LLC” adlı şirkət təsis edib. Floridada qeydiyyatdan keçmiş bu firmanın fəaliyyət məqsədi kimi daşınmaz əmlaka sahiblik göstərilib. Yarım ay sonra sözügedən şirkət ABŞ-nin bu ştatında, okean sahilində yerləşən malikanə satın alıb. Bu mülk Markarovanın ailəsinə 2.35 milyon dollara başa gəlib. Ukraynanın qüvvədə olan qanunvericiliyi yüksəkvəzifəli şəxslərdən və onların yaxın qohumlarından xaricdəki aktivləri, eləcə də daşınmaz əmlakları barədə hesabat verməyi tələb edir. Buna baxmayaraq, sabiq səfirin ailəsinin sonuncu bəyannamələrində bu malikanə haqqında heç bir məlumat yoxdur.

Qeyd edək ki, Oksana Markarova 2021-2025-ci illərdə Kiyevin Vaşinqtondakı diplomatik nümayəndəliyinə rəhbərlik edib. O, 2023-cü ilin iyulundan 2025-ci ilin avqustuna kimi, həmçinin Ukraynanın Antiqua və Barbudadakı fövqəladə səfiri vəzifəsini də icra edib. Ötən ilin payızında Ukrayna lideri Volodimir Zelenski onu ölkənin bərpası və investisiyalar üzrə məsləhətçisi təyin etmişdi.